အမေရိကန် အထက်လွှတ်တော်အမတ် မစ္စတာ ဂျွန်မက်ကိန်းဟာ မြန်မာ့အရေး ခရီးစဉ် အစိတ်အပိုင်း တရပ် အဖြစ် ထိုင်း-မြန်မာ အခြေစိုက် ဒီမီုကရေစီ အင်အားစု ခေါင်းဆောင်တွေနဲ့  ၂၀၁၁ ခုနှစ် မေလ ၃၀ ရက်နေ့က တွေ့ ဆုံ ဆွေးနွေးခဲ့သလို မဲဆောက်မြို့က မယ်တော်ဆေးခန်းကိုလည်း သွားရောက် လေ့လာခဲ့ပါတယ်။ Photo- senjohnmccainblog

အမေရိကန် အထက်လွှတ်တော်အမတ် မစ္စတာ ဂျွန်မက်ကိန်းဟာ မြန်မာ့အရေး ခရီးစဉ် အစိတ်အပိုင်း တရပ် အဖြစ် ဒီကနေ့ ထိုင်း-မြန်မာ အခြေစိုက် ဒီမိုကရေစီ အင်အားစု ခေါင်းဆောင်တွေ နဲ့ တွေ့ ဆုံ ဆွေးနွေးခဲ့တယ်လို့  သတင်း ရရှိပါတယ်။

မြန်မာနိုင်ငံ ဒီမိုကရက်တစ် အင်အားစု FDB ရဲ့ အတွင်းရေးမှုးချုပ် ဒေါက်တာ နိုင်အောင်နဲ့  နိုင်ငံရေး အကျဉ်းသားများ ကူညီစောင့်ရှောက်ရေးအသင်း AAPP တွဲဘက်အတွင်းရေးမှုး ကိုဘိုကြည် တို့ ကို ဆွေးနွေးခဲ့တာ ဖြစ်ပါတယ်။

မြန်မာ့ အရေးကို အမြဲတမ်း စိတ်ဝင်စားနေတဲ့ မစ္စတာ ဂျွန်မက်ကိန်း အနေနဲ့  လက်ရှိ မြန်မာနိုင်ငံရဲ့ အခြေအနေကို ကိုယ်တိုင် သိလိုတဲ့အတွက် အခုလိုတွေ့ ဆုံတာ လို့  ဒေါက်တာနိုင်အောင် က RFA ကိုပြောပါတယ်။

ဒါ့အပြင် မြန်မာ့ဒီမိုကရေစီရေး အတွက် မြန်မာအစိုးရကို အရေးယူ ပိတ်ဆို့တဲ့နည်းရော ထိတွေ့  ဆက်ဆံတဲ့ နည်းပါ သုံးသင့်တဲ့ အကြောင်း ပြောဆိုလိုက်တယ်လို့ လည်း ဒေါက်တာနိုင်အောင်က ဆိုပါတယ်။ “ကျနော်မြင်တာကတော့ US က ဒီအစိုးရသစ်ရဲ့ သဘောထားတွေ ဘာတွေ ကိုယ်တိုင်သိအောင် ကြိုးစားတဲ့ သဘောဘဲလို့ နားလည်တယ်။ နောက်ပြီးတော့ သူတို့ အမေရိကန်အစိုးရရဲ့ ပေါ်လစီကို သိအောင်ရှင်းတဲ့ သဘောလို့ နားလည်တယ်။

ကျနော်တို့ကတော့ ဒီအစိုးရတွေကို ပြောတဲ့အခါမှာ ဖိအားပေးတာရော ထိတွေ့ဆက်ဆံ တာရော နှစ်ခူစလုံး သုံးသင့်တယ်လို့ ကျနော်တို့ ယူဆပါတယ်။ လူ့အခွင့်အရေး ချိုးဖောက်မှုတွေရှိနေလို့၊ နိုင်ငံရေး အကျဉ်းသားတွေ ရှိနေလို့၊ အကုန်လုံး ပါဝင်တဲ့ အမျိုးသား ပြန်လည်သင့်မြတ်ရေး လုပ်ငန်းစဉ်တွေ မရှိနေလို့ ရင်းနှီးမြုပ်နှံမှုတွေ မလာတာကလည်း မြန်မာနိုင်ငံရဲ့ စီးပွါးရေး အခြေခံတွေ မကောင်းလို့၊ ဆိုတော့ အဲဒါတွေကို သူတို့ကို ထိတွေ့ပြီးမှ ရှင်းပြပြောပြ တိုက်တွန်း စည်းရုံးနေတာမျိုးက ကျနော်တို့က ကြိုဆိုပါတယ်။”

နိုင်ငံရေး အကျဉ်းသားများ ကူညီစောင့်ရှောက်ရေး အသင်း AAPP တွဲဘက် အတွင်းရေးမှုး ကိုဘိုကြည်ကတော့ အကျဉ်းထောင်ထဲက လက်ရှိ အခြေအနေနဲ့ နိုင်ငံရေးအကျဉ်းသားတွေ ကိစ္စကို ပြောလိုက်တယ်လို့  ပြောပါတယ်။ “ကျနော်ကတော့ နိုင်ငံရေး အကျဉ်းသားတွေ အကြောင်း။ အင်းစိန်ထောင်ထဲမှာ အစာငတ်ခံ ဆန္ဒပြနေတာ၊ ကလေးထောင်တို့ ခန္တီးထောင်တို့မှာ အစာငတ်ခံဆန္ဒပြနေတဲ့ အကြောင်းတွေ၊ နောက်ပြီးတော့ အကျဉ်းထောင်တွေထဲမှာ ဒီလူတွေကို စားရေးသောက်ရေးနဲ့ ကျမ်းမာရေးအတွက် လုံလောက်တဲ့ ထောက်ပန့်မှုတွေ မရှိဘူး။ ICRC လို အပြည်ပြည်ဆိုင်ရာ အဖွဲ့တွေကိုလည်း သူတို့က လုပ်ပိုင်ခွင့် မပေးဘူး ဆိုတာတွေကို ကျနော်တို့ တင်ပြတာတွေ ရှိတယ်။

နောက်တခုက အခုလက်ရှိ ဦးသိန်းစိန် အစိုးရအနေနဲ့ တကယ်တန်း အပြောင်းအလဲအတွက်ကို လုပ်မယ်ဆိုလို့ရှိရင် ပထမဆုံးက နိုင်ငံရေး အကျဉ်းသားတွေကို လွှတ်ဖို့လိုတယ် ဆိုတာကို ကျနော်တို့ ထပ်ပြီး ပြောပြတာတွေ ရှိတယ်။

နောက် sanction ရုတ်သိမ်းဖို့ ဦးသိန်းစိန် အစိုးရကရော ပြည်တွင်းက အမတ်တွေရော ကြိုးစားနေကြတာတွေ ရှိတယ်။ အဲဒီလို ကြိုးစားတယ်ဆိုရင်လည်း ပထမဆုံး အဆင့်အနေနဲ့က လူ့အခွင့်အရေး ချိုးဖောက်နေတာတွေကို ဦးသိန်းစိန် အစိုးရဘက်က ရပ်ပေးဖို့ လိုတယ်။ နိုင်ငံရေး အကျဉ်းသားတွေ လွှတ်ဖို့လိုတယ် ဆိုတာကို ကျနော်တို့ ပြောပြတာတွေ ရှိတယ်။”

မစ္စတာဂျွန်မက်ကိန်းဟာ မဲဆောက်မြို့က မယ်တော်ဆေးခန်းကိုလည်း သွားရောက်ပြီး လေ့လာခဲ့ပါတယ်။ မနက်ဖြန်မှာ မြန်မာနိုင်ငံကို သွားရောက်ဖို့  စီစဉ်ထားပါတယ်။

အဲဒီခရီးစဉ်မှာ မြန်မာအစိုးရ အဖွဲ့ ဝင်တချို့ နဲ့ တွေ့ ဆုံမှာ ဖြစ်သလို၊ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် အပါအဝင်၊ NLD အဖွဲ့ချုပ် ခေါင်းဆောင်တွေ၊ CRPP ပြည်သူ့  လွှတ်တော် ကိုယ်စားပြု ကော်မတီဝင်တွေနဲ့ လည်း တွေ့ ဆုံမှာ ဖြစ်ပါတယ်။

ထိုင်း-မြန်မာ နယ်စပ်က လူမှုရေးနဲ့ ကယ်ဆယ်ရေး လုပ်ငန်းတွေမှာ ကူညီပံ့ပိုးမှုတွေ အမြောက်အများ လိုအပ်နေဆဲဘဲလို့ အမေရိကန် အထက်လွှတ်တော်အမတ် ဂျွန်မက်ကိန်းက ပြောဆိုလိုက်ပါတယ်။ အကြောင်းစုံကို မအင်ကြင်းနိုင်က တင်ပြမှာပါ။

	ဆက်သွယ်မေးမြန်းချက်။
	အသံဖိုင်ယူရန်။

ဟောင်ကောင် တက္ကသိုလ် ပါမောက္ခ ဒေါက်တာ ကျော်ရင်လှိုင် ဦးဆောင်တဲ့ နိုင်ငံတကာ ပညာရှင် ရှစ်ဦးဟာ အမျိူးသား ဒီမိုကရေစီ အဖွဲ့ချုပ် NLD မှာ ပထမဆုံး အကြိမ် နိုင်ငံရေးသိပ္ပံ ပညာရပ် သင်တန်း လာရောက်ပို့ချမှာ ဖြစ်တယ်လို့ ပြန်ကြားရေး တာဝန်ခံ ဦးအုန်းကြိုင်က ဒီကနေ့ထုတ်ဖေါ် ပြောကြားလိုက်ပါတယ်။

မြန်မာ့ နိုင်ငံရေး အခြေအနေနဲ့ကိုက်ညီတဲ့ ခေါင်းစဉ်တွေကိုလည်း ပညာရှင်တွေက ရွေးချယ် ပို့ချသွားမှာ ဖြစ်တယ်လို့ သူက ပြောပါတယ်။

“ရည်ရွယ်ချက်ကတော့ အထွေထွေ အတွင်းရေးမှူး လွတ်လာပြီး ကတဲက အဖွဲ့ချုပ်မှာ လူငယ်တွေရော အဖွဲ့ဝင်တွေရောကို အရည်အချင်း မြှင့်တင်ဖို့ပေါ့၊ အဲဒီလို အစီအစဉ်တွေနဲ့ political science နဲ့ ပတ်သက်တဲ့ အဆင့်မြင့် သင်တန်းတခု ဒါ ဖွင့်လှစ်နိုင်တာ ဖြစ်ပါတယ်။ ဟောင်ကောင် တက္ကသိုလ် ပါမောက္ခ ဒေါက်တာ ကျော်ရင်လှိုင်က ကူညီပေးတာ ဖြစ်ပါတယ်။ ခေါင်းစဉ်တွေကတော့ ဖွဲ့စည်းပုံ အခြေခံ ဥပဒေများ၊ ဘာသာရပ်ဆိုင်ရာ တွေးခေါ်ပုံများ၊ သူတေသန ပြုလုပ်နည်းများ၊ အရှေ့တောင်အာရှ နိုင်ငံများ ၏ နိုင်ငံတကာ ဆက်ဆံရေး၊ ကောင်းမွန်သော အုပ်ချုပ်ရေး (good governance) စတဲ့ ဘာသာရပ်တွေ ဖြစ်ပါတယ်။”

သင်တန်းကို ဇွန်လ (၂၀) ရက်နေ့ကနေ (၂၈) ရက်နေ့အထိ ဖွင့်လှစ်မှာ ဖြစ်ပြီး ပြည်နယ်၊ တိုင်းအလိုက် အဖွဲ့ဝင် လေးဦးစီ ရွေးချယ် စေလွှတ်ဖို့ သင်တန်းနဲ့ ပတ်သက်တဲ့ အချက်အလက်တွေ ဒီကနေ့မှာ ကြိုတင် ကြေညာလိုက်တာလို့ ဦးအုန်းကြိုင်က ပြောပါတယ်။

သင်တန်းမှာ လာရောက်ပို့ချမယ့် ပညာရှင်တွေဟာ ဟောင်ကောင်၊ စင်္ကာပူနဲ့ ထိုင်းနိုင်ငံ တက္ကသိုလ်တွေက ပါမောက္ခတွေ ဖြစ်ပြီး အင်္ဂလိပ်လို ဟောပြော ပို့ချမှာ ဖြစ်ပါတယ်။ ဒါပေမယ့် ဘာသာပြန် အနေနဲ့ NLD အဖွဲ့ဝင် ပညာရှင်တွေက ဆောင်ရွက်ပေးမယ်လို့ ဦးအုန်းကြိုင်က ပြောသွားပါတယ်။

မေလ (၃၀) ရက်နေ့မှာ ကျရောက်တဲ့ ဒီပဲယင်း အရေးအခင်း နှစ်ပတ်လည် အဖြစ် ဗြိတိန်နိုင်ငံက မြန်မာ အရေး လှုပ်ရှားသူတွေက လန်ဒန်မြို့ မေဖဲယားရပ်ကွက်မှာ ရှိတဲ့  မြန်မာသံရုံးရှေ့ မှာ မနေ့က ဆန္ဒပြခဲ့ ကြပါတယ်။

ဒီပဲယင်း အရေးအခင်းမှာ ကျဆုံးသူတွေကို ဂုဏ်ပြုတဲ့ အနေနဲ့ ရော (၁၉၉၀) ရွေးကောက်ပွဲရလာဒ် ဥပေက္ခာ အပြုခံရတဲ့ အတွက် ကြေကွဲဝမ်းနည်းတဲ့ အနေနဲ့ ဒီဆန္ဒပြပွဲမှာ ပါဝင်သူတွေက အနက်ရောင်တွေ ၀တ်ဆင်ပြီး ဆန္ဒပြခဲ့တယ်လို့ ပါဝင်လှုပ်ရှားသူ တဦးဖြစ်တဲ့ ဦးမျိုးသိန်းက ပြောပြပါတယ်။ “ကျနော်တို့ Burma Democratic Concern BDC အပါအ၀င် သွားရောက် ဆန္ဒ ပြကြပါတယ်။ လူပေါင်း ရာကျော် လာပြီး စုစုစည်းစည်း ညီညီညွတ်ညွတ်နဲ့ ဆန္ဒပြ ကြပါတယ်။ တိုင်းရင်းသား ညီအကို မောင်နှမတွေအားလုံး အနက်ရောင်ကို ၀တ်ပြီး ဘာကိုပြသလည်းဆိုတော့ အဲဒီမှာ ဆုံးရှုံးသွားတယ်ပေါ့နော်။ သူတို့နဲ့အတူ သတိတရရှိနေတယ်၊ ၀မ်းနဲပါတယ်ဆိုတဲ့ အထိမ်းအမှတ်လည်း ဖြစ်ပါတယ်”

ဒီပဲယင်း အရေးအခင်း နှစ်ပတ်လည် အဖြစ် ဗြိတိန်နိုင်ငံက မြန်မာအရေး လှုပ်ရှားသူတွေက လန်ဒန်မြို့ မေဖဲယားရပ်ကွက်မှာရှိတဲ့ မြန်မာသံရုံးရှေ့ မှာ ၂၀၁၁ ခုနှစ် မေလ ၃၀ ရက်နေ့က ဆန္ဒပြနေပုံ။ ဓါတ်ပုံ - BDC

မနေ့က ကျရောက်ခဲ့တဲ့ ဒီပဲယင်း နှစ်ပတ်လည်အခမ်းအနားမှာ ဒီပဲယင်း လှုပ်ကြံမှု ကျူးလွန်ခဲ့သူတွေကို အစိုးရသစ်က အမြန်ဆုံး အရေးယူပေးဖို့  မြို့ နယ်ပေါင်း (၁၁) မြို့ နယ်က အမျိုးသား ဒီမိုကရေစီအဖွဲ့ ချုပ် NLD အဖွဲ့ ဝင်တွေက မိထ္ထီလာခရိုင် သာစည် မြို့ နယ်မှာ စုဝေး တောင်းဆိုခဲ့ကြပါတယ်။ ဒီအတောအတွင်းမှာဘဲ ဒီပဲယင်း အရေးအခင်းအပြီးမှာ အထိန်းသိမ်းခံရကာ ပြီးခဲ့တဲ့ နိုဝင်ဘာလကမှ အကျယ်ချုပ်ကနေ လွတ်မြောက်လာတဲ့  ဒေါ်အောင်ဆန်းစုကြည်က လာမယ့် ဇွန်လအတွင်း နယ်ထွက် စည်းရုံးရေး ခရီးစဉ်တွေ ပြန်စမယ်လို့ မနေ့က ပြောဆိုလိုက်ပါတယ်။

မြန်မာ့ ဒီမိုကရေစီခေါင်းဆောင်နဲ့ ဟောင်ကောင် တက္ကသိုလ် ကျောင်းသူ ကျောင်းသားတွေနဲ့  ဂြိုလ်တုက တဆင့် မေလ (၃၀) ရက်နေ့က ဆက်သွယ် ပြောဆို ဆွေးနွေးခဲ့ကြ ပါတယ်။ Photo - http://www0.hku.hk/socsc/assk/

မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည် တနင်္လာနေ့ က ဟောင်ကောင် တက္ကသိုလ် ကျောင်းသူ ကျောင်းသားတွေ နဲ့  အင်တာနက် ဗီဒီယိုက တဆင့် ဆက်သွယ် ပြောဆို ဆွေးနွေးခဲ့ကြ ပါတယ်။

ဟောင်ကောင် တက္ကသိုလ်က တာဝန်ရှိ ပုဂ္ဂိုလ်တွေ၊ ဆရာ ဆရာမတွေနဲ့  ကျောင်း သားတွေက ဒေါ်အောင်ဆန်းစုကြည်ကို မြန်မာနိုင်ငံရဲ့ လက်ရှိ အခြေအနေတွေနဲ့ နိုင်ငံရေး အကျဉ်းသား အကြောင်းတွေ မေးမြန်း ခဲ့ပြီး ဒေါ်အောင်ဆန်းစုကြည်က ပြန်လည် ဖြေကြားခဲ့ ပါတယ်။ ဒါ့အပြင် ဒေါ်အောင်ဆန်းစုကြည်က ဟောင်ကောင် တက္ကသိုလ်ကို ဗွီဒီယို မိန့် ခွန်းတခုလည်း ပေးပို့ ခဲ့ပါတယ်။

အဲဒီ မိန့်ခွန်းမှာ ဒေါ်အောင်ဆန်းစုကြည်က လူတွေကို လူကောင်း နဲ့ လူဆိုး ဒါမှမဟုတ် သုခမိန် နဲ့ လူ့ဗာလရယ်လို့  ခွဲခြားတာထက် လေ့လာ ဆည်းပူးသူနဲ့  လေ့လာ သင်ယူခြင်း ကင်းမဲ့သူရယ်လို့  ခွဲခြားတာက ပိုပြီး အဓိပ္ပါယ် ရှိတယ်လို့  ရှုမြင်ကြောင်း အစချီကာ ဟောင်ကောင် တက္ကသိုလ်ရဲ့ အောင်မြင်မှုတွေကို ချီးမွမ်း ပြောဆိုခဲ့ပါတယ်။

တဆက်တည်းမှာဘဲ မြန်မာနိုင်ငံက တက္ကသိုလ် ကောလိပ်တွေရဲ့ တချိန်က နာမည် ကျော်ကြား ကောင်းမွန်ခဲ့ပုံတွေနဲ့  လက်ရှိ ယိုယွင်းနေတဲ့ ပညာရေး စနစ်၊ တက္ကသိုလ် ကျောင်းသားတွေ က မြန်မာ့ နိုင်ငံရေးမှာ ခေတ်အဆက်ဆက် ပါဝင်ခဲ့ပုံတွေ ၊ လက်ရှိ နှစ်ရှည် ထောင်ဒဏ် ချမှတ်ခံရပုံတွေကို ဖော်ပြထားပြီး မိန့် ခွန်း နောက်ပိုင်းမှာတော့ ပညာရေး စနစ်တခု ဆိုတာဟာ လူ့ ဂုဏ်သိက္ခာနဲ့ လူ့ လောကရဲ့ တိုးတက်မှုကို တန်ဖိုးထား သင်ကြားပေးတဲ့ စနစ်တခုသာ ဖြစ်သင့်ပြီး တရား မျှတမှုနဲ့ လွတ်လပ်ခွင့်တွေဟာ လူသားတွေရဲ့ မွေးရာပါ အခွင့်အရေးတွေ ဖြစ်တယ်ဆိုတာကို နားလည်နိုင်စွမ်း မရှိတဲ့ သြဇာခံ သက်သက် လူတန်းစားကို မွေးထုတ်ပေးတဲ့ ယန္တရား တစ်ခု မဖြစ်သင့်ဘူးလို့  ပြောဆိုလိုက် ပါတယ်။

မြန်မာနိုင်ငံမှာ တနေ့ တော့ စစ်မှန်တဲ့  ပညာရေး စနစ်တခု ပေါ်ပေါက်လာပြီး အသိဥာဏ်နဲ့ ဆင်ခြင်တုံ တရားတွေ ဝေဆာ ဖူးပွင့်လာလိမ့်မယ်လို့  ယုံကြည်ကြောင်းဖြင့် ဒေါ်အောင်ဆန်းစုကြည်က သူမရဲ့မိန့် ခွန်းကို နိဂုံးချုပ်ထားပါတယ်။ ဒီအကြောင်းအရာ အပြည့်အစုံကို ဒေါ်ခင်ခင်အိက ကောက်နှုတ်တင်ပြထားတာ နားဆင်နိုင်ပါတယ်။

	ဆက်သွယ်မေးမြန်းချက်။
	အသံဖိုင်ယူရန်။

ဒေါ်အောင်ဆန်းစုကြည်နှင့် အမျိုးသားဒီမိုကရေစီအဖွဲ့ချုပ် စည်းရုံးရေးခရီးစဉ်အတွင်း အနှောင့်အယှက်ပေးခဲ့ကြသည့် လက်နက်ကိုင်လူတစုကို ဒီပဲယင်း အကြမ်းဖက်တိုက်ခိုက်မှု မဖြစ်ပွားမီ ဒီပဲယင်းမြို့နယ် ကျည်တောက်ပေါက် ကျေးရွာအနီးတွင် ၂၀ဝ၃ ခုနှစ် မေလ ၂၅ ရက်နေ့က တွေ့မြင်ရသည့် မှတ်တမ်းဓာတ်ပုံ ဖြစ်ပါသည်။(Photo: Ad Hoc Commission on Depayin Massacre- Burma)

ဒီပဲယင်း လုပ်ကြံမှုနဲ့ ပတ်သက်ပြီး ဘယ်သူ့မှာ တာဝန် အရှိဆုံးလဲဆိုတာ မှန်းဆပြောဆိုမှုတွေ အများအပြား ရှိနေပါတယ်။ စစ်ထောက်လှမ်းရေး အရာရှိဟောင်း ဗိုလ်မှူးဟောင်း ဦးအောင်လင်းထွဋ် ကတော့ ဒီပဲယင်း လုပ်ကြံမှုရဲ့ နောက်ကွယ်က အမိန့်ပေးသူဟာ ဗိုလ်ချုပ်မှူးကြီးသန်းရွှေ ဖြစ်တယ်လို့ သူ သိရှိထားတဲ့ အချက်အလက်တွေကို ကိုးကားပြီး ပြောဆိုပါတယ်။

သံတမန်ဟောင်း တဦးလည်း ဖြစ်၊ စစ်ထောက်လှမ်းရေး အရာရှိဟောင်းလည်း ဖြစ်တဲ့ ဦးအောင်လင်းထွဋ်ကို ဦးတင်အောင်ခိုင်က ဆက်သွယ် မေးမြန်းထားပါတယ်။

	ဆက်သွယ်မေးမြန်းချက်။
	အသံဖိုင်ယူရန်။

တိုးတက်သော ကရင် ဗုဒ္ဓဘာသာ တပ်မတော် (DKBA) မှ ဗိုလ်နှုတ်ခမ်းမွေး ခေါ် ဗိုလ်မှူးကြီး စောလားပွယ်သည် မြန်မာစစ်အစိုးရ၏ နယ်ခြားစောင့်တပ် အသွင်ပြောင်းရေး ဖိအားပေးမှုကို လက်မခံသည့် တပ်မဟာ ၅ တပ်မှူး ဖြစ်ပါသည်။ (RFA)

ဗိုလ်ချုပ်စောလားဘွယ်ရဲ့ DKBA အဖွဲ့နဲ့ တခြား လက်နက် ကိုင် တော်လှန်ရေး အဖွဲ့တွေ ပူးပေါင်းပြီး လှိုင်းဘွဲ့မြို့နယ် သံလွင်မြစ်အနီးက DKBA ဌာနချုပ် နေရာကို လွန်ခဲ့တဲ့ ၂၄ ရက်နေ့ကစလို့ ပြန်ပြီး သိမ်းပိုက်လိုက်တယ်လို့ သိရပါတယ်။

အဲဒီနေရာဟာ သူတို့အဖွဲ့အတွက် အရေးပါတဲ့ ဒေသတခု ဖြစ်တဲ့ အတွက် ပြန်သိမ်းပိုက်တာလို့ DKBA အဖွဲ့က ဗိုလ်မှူးကျော်သက် က ပြောပါတယ်။

ဒါ့အပြင် နိုင်ငံရေးအကျဉ်းသား အားလုံး ခြွင်းချက်မရှိ လွှတ်ပေးမှသာ လက်ရှိ ဦးသိန်းစိန်အစိုးရကို အရပ်သားအစိုးရ စစ်စစ်လို့ သတ်မှတ်နိုင်မယ့်အကြောင်းလည်း DKBA ဗိုလ်မှူးဆန်းအောင်က RFA ကို ပြောပါတယ်။

“အခုဟာက လွတ်ငြိမ်းချမ်းသာခွင့် ပေးတယ်ဆိုပြီးတော့ ထောင်သားတွေကို တနှစ်လား လျှော့ပေးတာတို့၊ တချို့က လပိုင်းလေးကျန်တယ်၊ တချို့က ရက်ပိုင်းလေး ကျန်တယ်၊ အဲဒါပဲ လွှတ်ပေးတယ်နော်။ လွတ်ငြိမ်းချမ်းသာခွင့်လို့ ကျနော်တို့ မမြင်ဘူး။

တကယ်တော့ ဒီအစိုးရဟာ ဒီပုပ်ထဲက ဒီပဲပဲ။ တကယ်လို့ အစိုးရသစ် ဆိုလို့ရှိရင် ပြီးခဲ့တာ ကန့်လန့်ကာချပြီး ဘဝသစ် တည်ဆောက်ရမယ်။ ကျနော်တို့ တိုင်းရင်းသားတွေနဲ့လည်း ဘာမှ အထူးအထွေ ကမ်းလှမ်းတာ မရှိသေးဘူး။ ဒီအစိုးရကို လက်ရှိအနေအထားအရ လုံးဝ ယုံကြည်မှု မရှိဘူး။ ဒါကြောင့် ကျနော်တို့ ရောက်တဲ့နေရာမှာ ပြည်သူလူထုနဲ့ ပူးပေါင်းတယ်၊ တော်လှန်ရေးအင်အားစုနဲ့ ပူးပေါင်းပြီးတော့ ကျနော်တို့ တိုက်နေတယ်”

DKBA ရဲ့ အဆိုအရ အခုသိမ်းပိုက်မှုမှာ နယ်ခြားစောင့်တပ်ရဲ့ တပ်မှူးတဦးဖြစ်တဲ့ ဗိုလ်ချုပ်ကျော်သန်းကို ဖမ်းမိခဲ့ပေမယ့် ပြန်ပြီး ထွက်ပြေးလွတ်မြောက်သွားပြီး ဘားအံကို ရောက်နေတယ်လို့ သိရပါတယ်။ ဒါ့အပြင် ဒီတိုက်ပွဲမှာ KNU တပ်မဟာ (၇) နဲ့ ABSDF ကျောင်းသားတပ်မတော်က ရဲဘော်တွေလည်း ပူးပေါင်းဆင်နွှဲခဲ့တယ်လို့ DKBA တပ်မှူးတွေက ပြောပါတယ်။

ဒီကိစ္စနဲ့ ပတ်သက်လို့ DKBA အဖွဲ့က ဗိုလ်မှူးကျော်သက်ကို RFA ဝိုင်းတော်သား ကိုနေရိန်ကျော် ဆက်သွယ်မေးမြန်းထားပါတယ်။

	ဆက်သွယ်မေးမြန်းချက်။
	အသံဖိုင်ယူရန်။

၂ဝ၁၁ ခုနှစ် မေလ ၃ဝ ရက်နေ့က ဟောင်ကောင်တက္ကသိုလ်တွင် ပြုလုပ်သည့် “အောင်ဆန်းစုကြည်နှင့် ရာစုနှစ် အထိမ်းအမှတ် စကားပြောခြင်း” တိုက်ရိုက် ဗီဒီယို ဆွေးနွေးခန်း အစီအစဉ်အကြောင်း ဟောင်ကောင် တက္ကသိုလ် အင်တာနက်စာမျက်နှာတွင် ဖော်ပြထားပုံ ဖြစ်ပါသည်။ (http://www0.hku.hk/socsc/assk/)

မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ လာမယ့် ဇွန်လအတွင်း နယ်ခရီးစဉ်တွေ စတင်တော့မယ်လို့ အေအက်ဖ်ပီ သတင်းမှာ ဒီကနေ့ ဖော်ပြထားပါတယ်။

ဒီကနေ့ ဟောင်ကောင်တက္ကသိုလ်က ဆရာဆရာမတွေ၊ ကျောင်းသူကျောင်းသားတွေနဲ့ အရပ်သား စုစုပေါင်း တထောင်လောက်နဲ့ အင်တာနက် ဗီဒီယိုကတဆင့် တိုက်ရိုက်ဆွေးနွေးပွဲ မှာ ဒေါ်အောင်ဆန်းစု ကြည်ကို ပရိသတ်က မေးမြန်းရာမှာ အဲဒီလို ဖြေကြားခဲ့တာ ဖြစ်ပါတယ်။

ခရီးစဉ်နဲ့ ပတ်သက်ပြီး သတ်သတ်မှတ်မှတ် မရှိသေးကြောင်းနဲ့ ဇွန်လ ၁၉ ရက်နေ့မှာ ကျရောက်တဲ့ ဒေါ်အောင်ဆန်းစုကြည် မွေးနေ့ နောက်ပိုင်းမှာ ခရီး စတင်မယ်လို့ စဉ်းစားနေကြောင်း ပါတီခေါင်းဆောင်ပိုင်းကို ပြောတယ်လို့ ပြောရေးဆိုခွင့်ရှိသူ ဦးဥာဏ်ဝင်းက အာအက်ဖ်အေကို ပြောပါတယ်။

“ဒေါ်အောင်ဆန်းစုကြည်အနေနဲ့ ဇွန် ၁၉ သူ့မွေးနေ့ ကျော်သွားတဲ့အခါမှာ ခရီးထွက်ဖို့ စဉ်းစားမယ်လို့ ကျနော်တို့ကို အဲဒီလိုပဲ ပြောတာ။ ဒေါ်စု နယ်ကို ခရီးသွားမယ်ဆိုတဲ့ အစီအစဉ်ကိုပါ၊ သူက ပြည်သူလူထုနဲ့ နိုင်ငံသားတွေနဲ့ တွေ့ချင်တဲ့ ဆန္ဒပဲ။ ဘယ်လိုပုံစံ ဖြစ်လာမယ်တော့ ကျနော်ကြိုပြီး မပြောချင်ပါဘူး”

ဒေါ်အောင်ဆန်းစုကြည် နယ်ခရီးစဉ်ဟာ အမျိုးသားဒီမိုကရေစီ အဖွဲ့ချုပ် NLD အနေနဲ့ လွတ်လပ်စွာ စည်းရုံးပြောဆိုခွင့် ရှိမရှိဆိုတဲ့ အချက်ကို စမ်းသပ်လိုက်တာလည်း ဖြစ်တယ်လို့ အေအက်ဖ်ပီ သတင်းမှာ ဖော်ပြထားပါတယ်။

ဒေါ်အောင်ဆန်းစုကြည် အပါအဝင် NLD အဖွဲ့ဝင်တွေ၊ ထောက်ခံသူတွေရဲ့ လုံခြုံရေးနဲ့ ပတ်သက်ပြီး အစိုးရက ဘာမှ တိတိကျကျ အာမ,ခံချက် ပေးထားတာ မရှိဘူးလို့ ဆိုပါတယ်။ ဒါပေမယ့် မြန်မာနိုင်ငံသားတိုင်းရဲ့ လုံခြုံရေးဟာ အစိုးရမှာ တာဝန်ရှိကြောင်း ဒေါ်အောင်ဆန်းစု ကြည်က ဟောင်ကောင်တက္ကသိုလ်က ပရိသတ်ကို ပြောကြားခဲ့ပါတယ်။

နေအိမ်အကျယ်ချုပ်မှ လွတ်လာသည့် ဒေါ်အောင်ဆန်းစုကြည် နိုဝင်ဘာ ၁၄ ရက်က အမျိုးသား ဒီမိုကရေစီ အဖွဲ့ချုပ် ဌာနချုပ်ရုံးသို့ ရောက်ရှိလာစဉ် ဝိုင်းဝန်းဆီးကြိုသော လူထု ပရိသတ်နှင့် နှုတ်ဆက်နေပုံ ဖြစ်ပါသည်။ (Photo: AFP)

မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်က မကြာမီ ကာလတွေအတွင်း နယ်ခရီးစဉ်တွေ ထွက်ဖို့ အစီအစဉ် ရှိတယ်လို့ ပြောကြား လိုက်တာနဲ့ ပတ်သက်ပြီး ဒေါ်အောင်ဆန်းစုကြည်ရဲ့ လုံခြုံရေးအတွက် စိုးရိမ်ပူပန်ကြောင်း ပြောဆိုသံတွေ ကျယ်ကျယ်လောင်လောင် ထွက်ပေါ်လာခဲ့ပါတယ်။

ဒေါ်အောင်ဆန်းစုကြည်က သူ နေအိမ်အကျယ်ချုပ်က ဒီတခေါက် လွတ်မြောက်ပြီးတဲ့နောက်မှာ အရင် အချိန်တွေကထက် အလွန် များပြားလှတဲ့ အလုပ်တာဝန်တွေနဲ့ ပိနေတဲ့အကြောင်း၊ ရုံးနဲ့ အိမ်နဲ့ အလုပ်နဲ့ ဆိုင်တဲ့ ကိစ္စရပ်တွေနဲ့သာ ရန်ကုန်မြို့တွင်း အချိန်ပြည့် သွားလာနေရကြောင်း၊ လ အနည်းငယ် ကြာရင်တော့ ခရီးထွက်ဖို့ စပြီး လုပ်နိုင်မယ်လို့ မျှော်လင့်ရကြောင်း RFA က ထုတ်လွှင့်နေတဲ့ “လူထုနဲ့ ဒေါ်အောင်ဆန်းစုကြည်” အစီအစဉ်ကနေ ပြောကြားခဲ့ပါတယ်။

ဒီလို ပြောကြားခဲ့ပြီးနောက်မှာ သူ့ရဲ့ လုံခြုံရေးအတွက် စိုးရိမ်ပူပန်သံတွေ အခုလို ထွက်ပေါ်လာခဲ့တာ ဖြစ်ပါတယ်။ RFA မှ မခင်ခင်အိက စုစည်းတင်ပြထားတာ နားဆင်နိုင်ပါတယ်။

	စုစည်းတင်ပြချက်။
	အသံဖိုင်ယူရန်။

နာမည်ဆိုးနှင့် ကျော်ကြားသော မြန်မာနိုင်ငံ အင်းစိန်အကျဉ်းထောင်၏ အုတ်ရိုးအပြင်ဘက်တွင် အစောင့်တဦး လှည့်ပတ်စောင့်ကြည့်နေပုံ ဖြစ်ပါသည်။ (PHOTO: AFP)

ရန်ကုန် အင်းစိန်ထောင်အတွင်း အစာငတ်ခံ ဆန္ဒပြနေတဲ့ နိုင်ငံရေး အကျဉ်းသား ၂၄ ဦးနဲ့ ပတ်သက်ပြီး အာဏာပိုင်တွေက ဖြေရှင်းပေးပြီးပြီလို့ သတင်းတွေ ထွက်ပေါ်နေပေမယ့် အမှန်တကယ် အခြေအနေ တိုးတက်လာအောင် ဖြေရှင်းမပေးသေး ဘူးလို့ ယူဆရကြောင်း အကျဉ်းသား မိသားစုတွေ က ပြောပါတယ်။

တိုက်ပိတ်ခံရသူတွေကို အဆောင်တွေကို ပြန်ပို့လိုက်ပြီလို့ ပြောဆိုနေပေမယ့် အဲ့ဒီအကျဉ်းသားတွေကို မေလ ၂၈ ရက်နေ့ကပြီး ထောင်ဝင်စာ ပိတ်ထားတယ်လို့ ဆိုပါတယ်။

နိုင်ငံရေးအကျဉ်းသားများ မိသားစု အကျိုးဆောင် ကွန်ယက်အဖွဲ့က ကိုအောင်ဇော်ထွန်းက အခုလို ပြောပါတယ်။

“၂၈ ရက်နေ့မှာ အစာငတ်ခံ ဆန္ဒပြနေတဲ့ နိုင်ငံရေးအကျဉ်းသား အားလုံးကို ထောင်ဝင်စာ ပိတ်လိုက်တယ်၊ တိုက်ပိတ်ထားတယ်လို့ ကြားရတယ်။ အထဲကနေ တဆင့် ကြားရတဲ့ သတင်းတွေအရ ဆိုရင် (၅) ဆောင် တိုက်မှာ ရှိတယ်လို့ ပြောတယ်။ (၅) ဆောင်ရဲ့ ဘေးနားမှာ တိုက် (၁)၊ တိုက် (၂) ဆိုပြီး သီးသန့်တိုက်တွေ ရှိတယ်။ အဲဒီထဲမှာ ထည့်ပိတ်ထားတယ်လို့ ကြားရတယ်။ ဘယ်လောက်ကြာကြာ ပိတ်ထားမလဲ ဘာညာတော့ ကျနော်တို့ တိတိကျကျ မသိရဘူး။

မေလ ၂၂ ရက်နေ့က အစာငတ်ခံ ဆန္ဒပြခဲ့တဲ့ နိုင်ငံရေး အကျဉ်းသားတွေဟာ သန့်ရှင်းလတ်ဆတ်တဲ့ အစားအစာ ပြည့်ပြည့်ဝဝ ရရှိဖို့၊ ဗလာစာအုပ် ခဲတံ ကိုင်ဆောင်ထားရှိခွင့်နဲ့ စာရေးသားခွင့် ရရှိဖို့၊ လူ့ ဂုဏ်သိက္ခာနဲ့ ကိုက်ညီတဲ့ ထောင်ဝတ်စုံကို ၆ လ တကြိမ် လဲပေးဖို့၊ ထောင်ဝင်စာ တွေ့ဆုံရာမှာ နိုင်ငံခြားသား အကျဉ်းသားတွေနည်းတူ လွတ်လွတ်လပ်လပ် တွေ့ဆုံခွင့်ရဖို့ အပါအဝင် အချက် ၆ ချက်ကို တောင်းဆို ဆန္ဒပြခဲ့တာပါ။

ထောင်အာဏာပိုင်တွေက ဆန္ဒပြ နိုင်ငံရေး အကျဉ်းသား တချို့ကို ထောင်တွင်း အပြစ်ပေးရာမှာ ပို့လေ့ရှိတဲ့ စစ်ခွေးတိုက်ထဲကို မေလ ၂၄ ရက်နေ့က ပို့ခဲ့ပါတယ်။ မေလ ၂၆ ရက်နေ့မှာတော့ စစ်ခွေးတိုက်ကို ပို့ခဲ့တဲ့ နိုင်ငံရေး အကျဉ်းသားတွေကို ပုံမှန်အဆောင်တွေထဲ ပြန်ပို့ပေးခဲ့ပြီး အခြေအနေ တင်းမာမှု မရှိတော့ဘူးလို့ ကြားသိရပါတယ်။

ဒီနောက်မှာတော့ ဆန္ဒပြ နိုင်ငံရေး အကျဉ်းသားအားလုံး တိုက်ပိတ်ခံရပြီး ထောင်ဝင်စာ တွေ့ခွင့်မရတဲ့အကြေင်း ကိုအောင်ဇော်ထွန်းက ဆက်ပြောပြပါတယ်။

“၂၇ ရက်နေ့ ကျတော့ နေပြည်တော် အထူး စုံစမ်းစစ်ဆေးရေးဌာနက ကားတွေနဲ့ ဝင်လာပြီး ထောင်ထဲမှာ နိုင်ငံရေး အကျဉ်းသားတွေနဲ့ ဆွေးနွေးတယ်။ အစာငတ်ခံ ဆန္ဒပြနေတဲ့ နိုင်ငံရေးအကျဉ်းသားတွေက စုစုပေါင်း ၆ ချက် တောင်းတယ်။ အဲဒီမှာ နေပြည်တော်ဘက်က ဆင်းလာတဲ့ အထူးစုံစမ်းစစ်ဆေးရေးအဖွဲ့က ၆ ချက်မှာ ၅ ချက်ပဲ လိုက်လျောတယ်။ အဓိက ကျတဲ့ အချက်တချက်ကို မလိုက်လျောတဲ့အတွက် နိုင်ငံရေး အကျဉ်းသားတွေက ထပ်ပြီး ဆန္ဒပြတယ်။ ‘သိန်းစိန်အစိုးရ အလိုမရှိ၊ အကျဉ်းဦးစီးရဲ့ ရက်စက်မှုတွေ ရပ်ဆိုင်းပစ်’ ဆိုတဲ့ ကြွေးကြော်သံတွေ အော်ဟစ်တယ်လို့ ကျနော်တို့ သိရတယ်။ အဲဒီအတွက် မနေ့ကတော့ သူတို့ကို တိုက်ပိတ်လိုက်ပြီလို့ ကြားလိုက်ရတယ်။ ဒါ နောက်ဆုံး ကျနော်တို့ သိထားရတဲ့ အခြေအနေပါ”

အင်းစိန်ထောင်မှာ နိုင်ငံရေးအကျဉ်းသား ၂ဝ ကျော် ဆန္ဒပြခဲ့တာ ဒီကနေ့ဆိုရင် ၈ ရက်မြောက်နေ့ ဖြစ်ပါတယ်။ အလားတူ အကျဉ်းသား အခွင့်အရေးအတွက် စစ်ကိုင်းတိုင်း ကလေးမြို့ အကျဉ်းထောင်မှာလည်း ရွှေဝါရောင် သံဃာ့လှုပ်ရှားမှု ခေါင်းဆောင် အရှင်ဂမ္ဘီရ အပါအဝင် နိုင်ငံရေးအကျဉ်းသား ၄ ဦး ဆန္ဒပြနေတဲ့ သတင်းတွေလည်း ထွက်ပေါ်နေပါတယ်။

မြို့တွင်း လုံခြုံရေး အစောင့်တာဝန်ကျ စစ်သားတဦး ဖြစ်ပါသည်။ (Photo: AFP)

ကချင်ပြည်နယ် ဝန်ကြီးတွေရဲ့ လုံခြုံရေးအတွက် ရဲတပ်ဖွဲ့ဝင်တွေကို တာဝန်ချထားတာမို့ မြစ်ကြီးနား မြို့နဲ့ ပတ်ဝန်းကျင်မှာ ရဲအစောင့် တာဝန်ယူသူ နည်းသွားပြီး ရာဇဝတ် မှုခင်းတွေ တိုးများလာနေတယ် လို့ ဒေသခံတွေက ပြောပါတယ်။

မစ်ကြီးနားမြို့နဲ့ ပတ်ဝန်းကျင်မှာ ရပ်ရွာလုံခြုံရေး တာဝန်ယူတဲ့ ရဲတပ်ဖွဲ့အင်အားဟာ နဂိုကထဲက သတ်မှတ်ချက် အရေအတွက် မပြည့်မီဘူးလို့ သိရပါတယ်။ ဒါ့အပြင် မေလ ၁၇ ရက်နေ့က ဦးသိန်းစိန် အစိုးရ ထုတ်ပြန်ခဲ့တဲ့ လွတ်ငြိမ်းချမ်းသာခွင့် အမိန့်နဲ့ ရာဇဝတ်အကျဉ်းသားတွေ လွတ်လာပြီးနောက် ပိုင်းမှာ ရာဇဝတ်မှုတွေ ပိုများလာတယ်လို့လည်း ဒေသခံတွေက ပြောပါတယ်။

ည ၇ နာရီ ၈ နာရီ၊ မှောင်ရိပ် သမ်းလာတာနဲ့ လုယက်မှုတွေ ဖြစ်ပွားနေတယ် လို့ ဒေသခံတယောက် က ပြောပါတယ်။

မြစ်ကြီးနားမြို့ဟာ နဂိုကတည်းက လူဝင်လူထွက်များတဲ့ မြို့ဖြစ်ပြီး အလုပ်အကိုင် အခွင့်အလမ်းရှာဖို့ မြန်မာနိုင်ငံ အနှံ့က လူတွေ လာရောက်နေထိုင်တဲ့ မြို့ဖြစ်ပါတယ်။ ဒါကြောင့် လုယက်ပြီး မော်တော်ဆိုင်ကယ်နဲ့ ထွက်ပြေးသူတွေ ဘယ်သူဘယ်ဝါ ဖြစ်တယ်ဆိုတာကို ရဲက ခြေရာခံလို့ မလွယ်ကူဘဲ အရေးလည်း မယူနိုင်ဘူးလို့ သိရပါတယ်။ ဒါ့အပြင် ပြည်နယ်ဝန်ကြီးတွေရဲ့ လုံခြုံရေးတာဝန် ယူထားရတဲ့အတွက် ပတ္တရောင် သိပ်မလှည့်နိုင်ဘူးလို့လည်း ဆိုပါတယ်။

အစိုးရ ထုတ်ပြန်ခဲ့တဲ့ လွတ်ငြိမ်းချမ်းသာခွင့် အမိန့်ကြောင့် မြန်မာတနိုင်ငံလုံးက အကျဉ်းသား တသောင်း လေးထောင်ကျော် လွတ်မြောက်လာပေမယ့် အများစုက ရာဇဝတ်သားတွေပဲ ဖြစ်ပြီး လွတ်လာတဲ့ နိုင်ငံရေး အကျဉ်းသားဦးရေ ၅ဝ ဝန်းကျင်သာ ရှိတယ်လို့ သိရပါတယ်။